Институт языков и культуры народов СВ РФ

 

Сахалыы дьыктаан

Катя Гладкина, ЛҮ-15 устудьуона, «Ийэ- тыл» пресс-киин · 14 Февраля 2017

Хотугулуу-Илиҥҥи норуоттар тылларын уонна култуураларын үнүстүүтүгэр сылын аайы тэриллэр Ийэ тыл уонна сурук-бичик декадатын чэрчитинэн олунньу 7 күнүгэр бүтүн ХИБҮ устудьуоннарыгар сахалыы дьыктаан суруйуута ыытыллынна.

Ирина Николаевна Сорова, саха тылын хаапыдыратын доцена, дьыктаан тэрийээччитэ:

-         Сахалыы дьыктаан биһиэхэ иккис сылын ыытыллар. Быйыл уопсайа 176 устудьуон кыттыыны ылла. ФЛФ, ИЗФИР, ИЕН, ПИ, ИФКИС, ИП, юридическай колледж оҕолоро уонна бэйэбит устудьуоннарбыт көхтөөх кыттыыны ыллылар. Дьыктаан тиэкиһигэр быйыл В. С. Яковлев-Далан «Кинигэ» кэпсээниттэн 205 тыллаах быһа тардыы ылылынна. Үгүс дьон «ҥ» уонна «н» дорҕооннору бутуйбут, сурук бэлиэтигэр, сирэй саҥаҕа уонна күүһүрдэр эбиискэни туттууга сыыспыт диэн бэлиэтии көрдүбүт. Үлэлэр бары номнуо бэрэбиэркэлэнэн сыталлар: «5» сыананы - 9 оҕо, «4» сыананы – 25 оҕо ыллылар. Оттон олунньу 13 күнүгэр, декада уопсай түмүгүн билиһиннэриигэ 14 бастыҥ үлэлээхтэри ааттыахпыт, бирииһинэн уонна грамотанан наҕараадалыахпыт.

«Омук күүһэ – өйүгэр, өйүн күүһэ - тылыгар» диэн өс хоһоонугар этэллэринии, норуот бэйэтин тылын билбэт буоллаҕына – норуот буолбат. Омук кэскиллээх буоларын туһугар үүнэр көлүөнэ төрөөбүт тылын умнуо суохтаах. Сахалыы дьыктаан, бастатан туран, бэйэ билиитин тургутан көрүү буолар. Төрүт тылбыт орфографиятын, грамматикатын умнубат туһуттан маннык тэрээһиннэргэ кыттар олус туһалаах. Сахабыт тылын харыстыах, таптыах, үөрэтиэх диэн ыҥырабын!