Литературнай оонньуу

 

Кулун тутар 23 күнүгэр Хотугулуу-Илиҥҥи норуоттар тылларын уонна култуураларын үнүстүүтүгэр устудьуон билимин нэдиэлэтин чэрчитинэн литератураны билиигэ хамаанданан оонньуу ыытылынна.

Күрэххэ литература хаапыдыратын устудьуоннара 4 хамаандаҕа арахсан, туспа аат-суол толкуйданан кытыннылар. Хамандыырдарынан 4 куурус устудьуоннара Афанасьева Сардаана («Дьикти саас» хам.), Иванова Саргы («Аманнар» хам.), Плотникова Анисия («Куйаар» хам.) уонна Трофимова Айыына («Сааскы кэм» хам.) эрдэттэн талыллыбыттара. Кыргыттар кылгас кэм иһигэр хамаандаларын түмэн, бэлэмнэнэн, ох курдук оҥостон кэлбиттэр.

Оонньуу станцияларынан барда: 1 станция – классик суруйааччыларга билиини тургутта; 2 станцияҕа – саха буойун-суруйааччыларын туһунан ыйытыыларга хоруйдаатыбыт, проект толкуйдаатыбыт; 3 станцияҕа – народнай суруйааччылары билиибитин көрдөрдүбүт; 4 станцияҕа – кириитиктэр, чинчийээччилэр үлэлэрин төһө билэрбитин бэрэбиэркэлэннибит. Маны таһынан, «дьиэтээҕи сорудах» быһыытынан эҕэрдэ нүөмэр уонна Бүөтүр Тобуруокапка, Сэмэн Даниловка сыһыаннаах иккилии боппуруоһу бэлэмнээн кэлбиппит. Бу боппуруостары хамаандаларга биэрэн, хардарыта хоруйдастыбыт, баал ыллыбыт.

Оонньуу түмүгэр саамай үрдүк көрдөрүүлээх (63,5 баал) «Дьикти саас» хамаанда кыайыылааҕынан таҕыста. Кыайбыт хамаанда дьупулуомунан наҕараадаланна, Өксөкүлээх Өлөксөй «Саха интеллигенциятыгар» кинигэти уонна минньигэс торду бириис быһыытынан тутан үөрүүлэрэ өссө үрдээтэ. Кыттааччыларга туоһу сурук туттарылынна.

Маннык оонньуу устудьуоннар билиилэрин хаҥатарын таһынан хамаандаҕа үлэлииргэ, түмсүүлээх буоларга үөрэтэр. Ол иһин субу күрэх үгэскэ кубулуйан сылын аайы ыытыллара буоллар олус туһалаах буолуо эбит дии санаатым.