Размер шрифта: A AA Изображения Выключить Включить Цвет сайта Ц Ц Ц Обычная версия

Северо-Восточный
федеральный университет
имени М.К. Аммосова

Версия для слабовидящих

1
  • «Айхал сахам тылыгар!» хоһоон ааҕыытын күрэҕэ түмүктэннэ

     

    13.11.2017 13:14:00

    Рейтинг новости:

    2+

    Просмотров: 95

    «Айхал сахам тылыгар!» хоһоон ааҕыытын күрэҕэ түмүктэннэ


    «Айхал сахам тылыгар!» хоһоон ааҕыытын күрэҕэ түмүктэннэ

     

    Сэтинньи 10 күнүгэр саха народнай поэта Петр Тобуруокап төрөөбүтэ 100 сылыгар аналлаах “Айхал сахам тылыгар!” диэн университет үрдүнэн ыытыллар хоһоон ааҕыытын күрэҕин түмүктүүр түһүмэҕэ буолла.

    Күрэх бастакы түһүмэҕэ алтынньы 25 күнүгэр ыытыллыбыта. Манна университет араас факультеттарыттан, институттарыттан (ГРФ, ИЗФИР, ИЯКН СВ РФ, КИТ СВФУ, МИ,  ФЛФ, ФТИ) барыта 40-ча устудьуон кыттыбыта, П. Тобуруокап хоһооннорун сахалыы, нууччалыы тылынан уус-ураннык аахпыттара. Дьүүллүүр сүбэ (председатель Аркадий Новиков аатынан Майатааҕы “Көөчөөн көрө” мини-театр артыыһа В.В. Егорова) 18 бастыҥ кыттааччыны иккис түһүмэххэ аһарбыта.

    Түмүктүүр түһүмэххэ кыттааччылар олус бэлэмнэнэн кэлбиттэр: сахалыы мааны таҥас таҥныбыттар, тылларын-өстөрүн чочуйбуттар. Күрэх ыҥырыылаах ыалдьыттарынан поэт кыыһа Любовь Петровна Тобуруокаба, Үөһээ Бүлүү улууһунааҕы централизованнай библиотечнай систиэмэ дириэктэрэ Наталья Кирилловна Петрова, Саха Республикатын народнай артыыһа Зоя Петровна Багынанова буоллулар. Зоя Петровна Дьүүллүр сүбэ бэрэссэдээтэлинэн буолбута кыттааччылары ордук долгутта, эппиэтинэстэрин үрдэттэ. Түмүктүүр түһүмэххэ барыта 16 устудьуон кытынна.

    Хоһоон түһүлгэтин литература кафедратын устудьуоннара Элеонора Егорова (ЛР-17), Афоня Руфов (ЛР-17),  Анна Эверстова (ЛТ-17), Ньургустана Дмитриева (ЛТ-17), Жанна Иванова (ЛР-16) ылбаҕай ырыаларынан киэргэттилэр. Маны таһынан тэрийэр бөлөх устудьуоннара (ЛР-15) дьүүллүүр сүбэ үлэлиир кэмигэр кыттааччыларга уонна ыалдьыттарга П.Н. Тобуруокап олоҕор, айар үлэтигэр анаммыт викторинаны ыыттылар, лотерея оонньоттулар. Кыттааччылар, ыалдьыттар ХИФУ Научнай библиотеката бэлэмнээбит П.Н.Тобуруокап олоҕун, айар үлэтин сырдатар быыстапканы кэрэхсээн көрдүлэр. Викторина кыайыылааҕынан саамай элбэх сөптөөх хоруйу биэрэн, литературнай салаа бастакы кууруһун устудьуона Артем Осипов (ЛР-17) күрэх спонсора «Лена» кинотеатр туруорбут бирииһин - саҥа тахсар киинэҕэ 2 билиэти - ылла. Оттон лотерея бириистэрэ - П.Н. Тобуруокап айымньыларын 1-кы тома уонна «Папирус» хампаанньаттан сертификат - «бааттаах тарбахтаах» устудьуоннарга  тигистилэр.

    Дьүүллүүр сүбэ түмүгүн таһаарыан иннинэ Саха Республикатын народнай артыыһа, П.А. Ойуунускай аатынан Саха академическай театрын артыыһа З.П. Багынанова күрэх олус үчүгэйдик ааспытын, астыммытын биллэрдэ уонна П.Н. Тобуруокап «Кыыс мичээрэ» балладатын иэйиилээхтик ааҕан кыттааччылары, ыалдьыттары долгутта.

    Икки түһүмэхтээх хоһоон ааҕыытын түмүгэ маннык буолла:

    Саха народнай поэта Петр Тобуруокап төрөөбүтэ 100 сылыгар аналлаах “Айхал сахам тылыгар!” диэн университет үрдүнэн ыытыллар хоһоон ааҕыытын күрэҕин кыайыылааҕынан Медицинскэй институт иккис кууруһун устудьуона Светлана Черкасова (МИ, ПО-16-201-2) буолла. Кыайыылаахха сүрүн бириис – Москва куоракка Ороһуоспатааҕы сынньалаҥҥа барар путевка - туттарылынна.

    II миэстэҕэ магистрант Александр Гурьев (ИЯКН СВ РФ, М-СИТСЯ-17) уонна 1 куурус устудьуона София Гоголева (ИЯКН СВ РФ, ПО-МХК-17) таҕыстылар.

    III миэстэни 3 куурус устудьуона Анна Аманатова (ИЯКН СВ РФ, БА-ЛР-15), 5 куурус устудьуона Сандал Павлов (ФЛФ) уонна 1 куурус устудьуона Дьулустаан Никаноров (ГРФ, БА-НД-17-2) ыллылар.

    Анал ааттар маннык кыттааччыларга иҥэрилиннилэр:

    «Кэскиллээх ааҕааччы» - Артем Осипов (ИЯКН СВ РФ, БА-ЛР-17);

    «Хоһоонноохтук ааҕыы» - Мария Ефремова (ФТИ, 4 к.),

    «Иэйиилээхтик ааҕыы» - Екатерина Ефимова (ФЛФ, 5 к.),

    «Умсугутуулаах ааҕыы» - Алексей Филиппов (КИТ СВФУ, ПКС-17-1).

    «Хомоҕой ааҕааччы» - Педагогическай үөрэхтээһин саха-китайскай салаатын 2 кууруһун устудьуоннарын бөлөҕө.

    Призердарга, номинаннарга тэрээһин спонсордарыттан сыаналаах бириистэр туттарылыннылар. Күрэх кыттааччылара бары туоһу суругунан бэлиэтэннилэр уонна поэт дьиэ кэргэнин аатыттан «Чабырҕах азбука» саҥарар кинигэни бэлэх ыллылар.

    Түмүккэ саха литературатын кафедратын сэбиэдиссэйэ, филологическай наука кандидата, доцент В.Г. Семенова дьүүллүүр сүбэ бэрэссэдээтэлигэр, бары чилиэннэригэр, поэт төрөөбүт улууһун баһылыгар В.С. Поскачиҥҥа, Үөһээ Бүлүү улууһунааҕы централизованнай библиотечнай систиэмэ дириэктэригэр Н.К. Петроваҕа университет ректорын Е.И. Михайлова аатыттан махтал суруктары туттартаата, бары спонсордарга тэрийээччилэр ааттарыттан улахан махталын биллэрдэ. Поэт кыыһа Л.П. Тобуруокаба аҕатын хоһооннорун университет атын факультеттарын, институттарын устудьуоннара ааҕалларыттан олус үөрбүтүн, онтон улаханнык долгуйбутун туһунан эттэ. Кини аҕатын туһунан кинигэлэри тэрээһини П. Тобуруокап “Этиий миэхэ эн биир тылла...” хоһоонугар суруллубут ырыанан арыйбыт 1 куурус устудьуонугар Элеонора Егороваҕа бэлэхтээтэ.

     

    Күрэх спонсордара:

    ·         Народнай поэт П.Н. Тобуруокап дьиэ кэргэнэ Тобуруокаптар-Наумовтар;

    ·         М.К. Аммосов аатынан Хотугулуу-Илиҥҥи федеральнай университет. Ректор Е.И. Михайлова https://www.s-vfu.ru ;

    ·         Үөһээ Бүлүү улууһун дьаһалтата. Баһылык В.С. Поскачин;

    ·         Үөһээ Бүлүү улууһун культураҕа уонна духовнай сайдыыга департамена. Салайааччы С.С. Петрова;

    ·         П. Тобуруокап аатынан Үөһээ Бүлүүтээҕи культура киинэ. Дириэктэр. А.С. Босикова;

    ·         Үөһээ Бүлүүтээҕи норуот айымньытын киинэ. Дириэктэр Д.Д. Дьячковский;

    ·         Г. Николаев аатынан Үөһээ Бүлүү улууһун Ороһу нэһилиэгин культурнай-сынньанар тэрилтэтэ. Дириэктэр М.С. Захарова;

    ·         Үөһээ Бүлүү улууһунааҕы централизованнай библиотечнай систиэмэ. Дириэктэр Н.К. Петрова;

    ·         Үөһээ Бүлүү улууһун Нам нэһилиэгин дьаһалтата. Баһылык А.И. Кардашевскай;

    ·         П.А. Ойуунускай аатытан Саха академическай театра. Дириэктэр А.П. Николаев;

    ·         ООО «Киэргэ». Дириэктэр А.К. Павлов http://www.kierge.com ;

    ·         «Papirus» хампаанньа. Инстаграм papirus_ykt;

    ·         ООО «Тиссен-Пласт». Дириэктэр С.П. Иванов;

    ·         ООО «Айан-Трэвел». Дириэктэр А.А. Борисова;

    ·         «Кинотеатр Лена» http://cinemalena.ykt.ru ;

    ·         ИП Столярчик Мария Юрьевна;

    ·         Саха Республикатын Народнай депутата Филиппова Марфа Семеновна;

    ·         Саха Республикатын Народнай депутата, Үөһээ Бүлүү улууһун бочуоттаах гражданина, Республиканскай лицей дириэктэрэ Шамаев Иван Иванович.

     
     
     
     
     
     
     
     
     
     
     
     
     



    закрыть

    Антиспам:

    CAPTCHA