Кулун тутар 20 күнүгэр АБ Хотугулуу-Илиҥҥи норуоттар тылларын уонна култуураларын үнүстүүтүгэр Устудьуон билим нэдиэлэтин арыллыыта буолан ааста. Манна үнүстүүт дириэктэрин билимҥэ солбуйааччы Матрена Петровна Попова уонна устудьуон билим үлэтигэр эппиэтинэстээх Ирина Владимировна Собакина нэдиэлэ устата буолар тэрээһиннэр тустарынан билиһиннэрдилэр, Билим нэдиэлэтэ туох сыаллаах-соруктаах ыытылларын туһунан кэпсээтилэр. Устудьуоннар кылгас кэнсиэр бэлэхтээн көрөөччүлэри сэргэхситтилэр.

 Ону таһынан, үнүстүүт иһинэн үлэлиир Устудьуон билимин түмсүүтэ устудьуоннарга, маҕыстырааннарга анаан “Устудьуон билим үлэтэ” диэн төгүрүк остуол тэрийдилэр. Манна кэлбит устудьуоннар элбэх саҥаны-сонуну биллилэр-көрдүлэр. Ол курдук,  хайдах билиминэн дьарыктанан саҕалыахха сөбүн, ханнык тиэмэни талар ордугун туһунан кэпсэттилэр, сүбэ-ама биэрдилэр. Ону тэҥэ билимҥэ үрдэтиллибит истипиэндьийэ ирдэбиллэрин ырытыстылар.

Үнүстүүт билим нэдиэлэтин тэрээһиннэригэр көхтөөх кыттыыны ыларгытыгар ыҥырабыт. Маннык тэрээһиннэр киһи тус бэйэтигэр элбэх саҥаны-сонуну арыйар, дьон иннигэр толлубакка саҥарарга, санааны төрөөбүт тылынан аһаҕаастык үллэстэргэ үөрэтэр.

Юлия Данилова, ЛТ-15