Аан тыл

Убаастабыллаах ааҕааччы, Эн “Сырдыгынан сыдьаайар ХИБҮ” диэн кыра кинигэ электроннай барыйаанан ааҕарга туруннуҥ. Тус санааҕынан салайтаран бу кинигэни ааҕарга санаанаххына, Саха судаарыстыбаннай үнүбэрсиэтигэр, онтон салгыы М.К. Аммуоһап аатынан Хотугулуу-Илиҥҥи бэдэрээссийэлии үнүбэрсиэккэ биир кэмҥэ алтыһан ааспыт үөлээннээхтэргин, эйигин үөрэппит учууталларгын, уһуйааччыларгын, эбэтэр бииргэ үөрэммит доҕотторгун ахтан-санаан ылыаҥ.
Соҕурууҥҥу нуучча суруйааччыта Жарко Петан маннык диэн этэн турардаах: “Инники кэскил туһугар бэлиитиктэр кыһаллаллар, урукку сырдык олоҕу историктар үөрэтэллэр, билиҥҥи сырдык олох туһунан суруналыыстар сырдаталлар”. Кырдьык оннук, билиҥҥи сырдык олох, норуокка наадалаах исписэлиистэри бэлэмниир үнүбэрсиэт соругун туһунан биһиги суруйабыт. Онтон ол соругу олоххо ким киллэрэрий? Биллэн турар, ол уһуйааччылар, ХИБҮ бэрэпиэссэрдэрэ, учуонайдара буолаллар. Хас биирдии устудьуон уһуйааччыны кытары алтыстаҕын ахсын бэйэтигэр тугу эрэ саҥаны арыйар.
ХИБҮ дьон болҕомтотун тардар улахан соругу толорор. Үнүбэрсиэккэ биһиги өрөспүүбүлүкэбититтэн эрэ буолбакка, атын дойдуттан уонунан тыһыынча устудьуон үөрэнэр. Кинилэри сайдыылаах уонна үрдүк таһымнаах уһуйааччылар үөрэтэллэр. Үөрэх кыһата ХИБҮ буолуоҕуттан ыла биэс сыл устата, үнүбэрсиэт аан дойду таһымыгар тахсарыгар олук уурулунна. Онно “Наш университет” ХИБҮ сонуннарын эрэдээксийэтин үлэтин кыра кэрчигэ киирэриттэн олус үөрэбит. “Биһиги барыта куһаҕан диэбэппит, биһиги хайдах тупсарар туһунан суруйабыт” диэн девизтээх үөрэх корпоративнай хаһыата, 24 араас балаһалаах, киэҥ араҥаҕа ананар. Араас тиэмэлээх иһитиннэрии ортотугар, ааҕааччы бэйэтин тылынан – сахалыы “Аартык” сыһыарыыны ааҕан элбэҕи билиэн сөбүттэн биһиги олус астынабыт.
Биэс сыл устата, хаһыакка ХИБҮ салайааччыларын, интэриэһинэй дьонун кытары бэсиэдэ бэчээттэнэн таҕыста. Норуот устуоруйатын уонна култууратын кытары билиһиннэрдибит, олох-дьаһах уонна устуоруйа-биографическай кэпсэтиилэрин устудьуоннартан, уһуйааччылартан саҕалаан бэлиитиктэргэ, улахан салайааччыларга тиийэ ыыттыбыт. Ол бэсиэдэлэргэ тирэҕирэн ааҕааччы, бэдэрээссийэлии үнүбэрсиэт мөссүөнүн оҥорон көрүөн сөп. Үнүбэрсиэт олох-дьаһах үнүстүүтүн курдук, СӨ Үрдүк үөрэх сайдарыгар анаан, устудьуоннары, уһуйааччылары кытары билиитин үллэстэр дьону кытары кэпсэтэргэ, бииргэ үлэлииргэ бэлэм.
Хомуурунньукка араас жанрдаах матырыйааллар киирдилэр, ол курдук манна мэтириэт-интервью, персональнай интервью, бэсиэдэ, диалог, уочарка онтон да атыттар. Суруналыыстар бэсиэдэлэһээччини кытары үтүө сыһыаннарынан, ХИБҮ туһунан араас матырыйаал манна киирдэ. Онон манна тахсар матырыйааллары дуоһуйа ааҕаргытыгар ыҥырабыт!

Никита Аргылов, ХИБҮ сонуннарын сүрүннүүр эрэдээктэрэ

закрыть

Антиспам:

CAPTCHA