ХИБҮ исписэлиистэрэ интерактивнай хаартаны оҥордулар

26.12.2016 17:03:00

Рейтинг новости:

+

Просмотров: 39

ХИБҮ исписэлиистэрэ интерактивнай хаартаны оҥордулар

ХИБҮ исписэлиистэрэ Саха сирин археологическай хаһыытын интерактивнай хаартатын оҥордулар. Хаарта, бастатан туран историк устудьуоннарга төһүү күүс буолуоҕа. Бу хаарта ис хоһооно биир сири эрэ хабан буолбакка, көрдөрөн үөрэтэр босуобуйа быһыытынан оҥоһуллубут. Хаартаҕа киирбит матырыйаалы археологическай эспэдииссийэлэри тэҥэ, Саха сирин уонна Арассыыйа киин куораттарын архыыбын хаһан сылы быһа талан хомуйбуттар.

Хаарта билими чинчийэр уонна үөрэтэр аналлаах оҥоһуллубут. Көрдөрөн үөрэтэр матырыйаал уһуйааччы үлэтин чэпчэтэн биэрэр кыахтаах. “Билиҥҥи үйэ устудьуона интерактивнай өттүнэн быдан сайдыылаах, дьэрэкээн өҥнөөх, көрдөрөн үөрэтэр матырыйаалы бэйэтигэр быдан бигэтик ылынар”, - диир ХИБҮ Историческай бакылтыат археология уонна Арассыыйа Хотугулуу-Илиҥҥи устуоруйатын хаапыдыратын үрдүкү уһуйааччыта Кюннэй Пестерева. Бырайыакка Саха сирин өрүс аттынааҕы оройуоннарыгар араас үйэҕэ көстүтэлээбит сүүстэн тахса эбийиэк киирдэ. Олортон хас биирдиилэрин ханна баара, быһаарыыта уонна үөрэтии кылгас ис хоһооно киирэ сылдьар.

Өрөспүүбүлүкэҕэ барыта 300 тахса археологическай пааматынньык баара биллэр. “Устудьуоннартан ураты бу хаарта исписэлиистэр, археолог-учуонайдар, этнографтар уонна историктар билими чинчийэр үлэлэригэр туһаныахтарын сөп”, - диэн кэпсиир ХИБҮ Историческай бакылтыат Арассыыйа историятын хаапыдыратын үрдүкү уһуйааччыта Александра Прокопьева.

Дьиҥэр, билиҥҥитэ хаарта устудьуоннарга анаммыт диэн буоллаҕына, кэлин туһанар дьон үксүөн сөп. “Бу маҥнайгы боруобалыыр түһүмэх буолар, салгыы пааматынньык ахсаанын элбэтэн, кэҥэтэн иһиэхпит”, - диэн санаатын этэр ХИБҮ Историческай бакылтыат Хоту сири үөрэтии хаапыдыратын үрдүкү уһуйааччыта Любовь Семенова.

Хаартаны оҥорууга, исписэлиистэри тэҥэ, устудьуоннар эмиэ кыттыстылар. Кинилэр быраактыкаҕа сылдьан, археолог идэтэ диэн хайдаҕын эттэринэн-хааннарынан биллилэр. Историк идэтин баһылаары сылдьар ыччаттарга маннык дьарык олус туһалаах. “Бу хаартаны оҥоруу үлэтигэр кыттан, номнуо биһиги үөрэппит археологическай пааматынньыктарбытын илдьиритэн өйдүүргэ уонна археологическай хаһыылары ыытыы аналын тобуларга сүрдээх улахан уопуту ыллым. Үс ыйдаах сайыммытыгар археологическай хаһыыны ыытыы, чуолаан биһиги Сахабыт сиригэр уратылаах”, - диэн кэпсиир ХИБҮ Историческай бакылтыат үһүс кууруһун устудьуона Екатерина Дивдевилова.

Саҥаны киллэрии устудьуоннар үөрэнэллэригэр, ону тэҥэ чинчийэр үлэни суруйалларыгар туһалаах буолуоҕа. Интерактивнай хаарта, билими чинчийии бырайыагын бэлэмнииргэ сөптөөх суолу ыйыан сөп.

Автор: НВК "Саха"

закрыть

Антиспам:

CAPTCHA