Саха быраастарын туһунан ролик дьон болҕомтотун тарта

-->
Саха быраастарын туһунан ролик дьон болҕомтотун тарта

28.12.2016 14:56:00

Рейтинг новости:

+

Просмотров: 146

Саха быраастарын туһунан ролик дьон болҕомтотун тарта

Соторутааҕыта “Мин бырааспын” диэн медицинэ үлэһиттэрин ыарахан үлэтин ойуулаан көрдөрөр видеоролик интэриниэт ситимигэр тахсыбыта. Киинэни Саха сирин олохтоохторо эрэ буолбакка, бүтүн дойду дьоно биһирээн, үрдүктүк сыаналаатылар. Сэттэ мүнүүтэлээх видеороликка, быраастар тоҕо, туох санааттан бу идэни баһылаабыттарын көрдөрөр, кинилэр оҕо эрдэхтэринэ сүрэхтэригэр иҥпит өйдөбүл ахтыллан ааһар. Көрөөччү идэ араас өрүтүн көрөн, хайдахтаах курдук аһыныгас, тулуурдаах уонна дьоҥҥо көмөлөһүөн баҕарар, күн аайы кинилэр санныларыгар сүктэриллэр эппиэтинэһи өйдүүр дьон быраас идэтин баһылыырын бу видеороликка көрөр.

Киинэ режиссера Диана Худаева кэпсииринэн, бу киинэни оҥорорго 2013 сыллаахха тэриллибит, өрөспүүбүлүкэбит ойуччу сытар оройуоннарын олохтоохторун олоҕун-дьаһаҕын туһунан документальнай киинэни устар “Күн оҕолоро” диэн айар бөлөх улахан кэлэктиибэ туруулаһан үлэлээбит. 2016 сыл күһүнүгэр уопсастыба үлэһитэ Наталья Каратаева Дианаҕа бүөр ыарыһахтарын өйүүр үлэни ыытарын туһунан кэпсээбит. Кинини кытары кэпсэтии кэнниттэн, ыарыһахтарга көмөлөһөр санаа үөскээбит уонна ыарахан ыарыынан ыалдьан сытар сүүһүнэн киһиэхэ бэриллэр биир чыпчылҕан түгэн, ол эбэтэр уорганы көһөрөн олордуу туһунан киинэ устар санаа киирбит.

Маҥнайгы медицинскэй социальнай ролигы уһулуу кэмигэр, үрүҥ халааттаах аанньалларга өрүү истиҥник сыһыаннаһар “Күн оҕолоро” дьону быыһыыр идэҕэ киирэллэригэр уустуктары көрсөн, сотору кэминэн, күннээҕи дьоруойдар – медиктэр тустарынан киинэ иккис сенарийа күөрэйэн тахсыбыта.

Иккис киинэни “Медицинэ национальнай киинигэр”, “Медицинэ суһал көмөтүн киинигэр”, ону тэҥэ ХИБҮ Медицинскэй үнүстүүтүгэр уонна улуус балыыһатыгар устубуттар. “Мин бырааспын” киинэ дьоруойдарын оруолугар ааттаммыт килииникэлэр быраастара, Медицинскэй үнүстүүт устудьуоннара, Саха тыйаатырын уонна Нуучча драмматическай тыйаатырын артыыстара уонна кинилэр оҕолоро оонньообуттар.

-Быраастар олус үчүгэйдик оонньоотулар, ылан эттэххэ, биир тыынынан уһулунна, - диэн кэпсиир быраастары кытары үлэ уратытын ойуулуур киинэ режиссера. Быраастар киинэҕэ уһуллар талааннарын маннык диэн быһаарыахха сөп, уустук идэ үлэһиттэрэ камераҕа оонньооботтор, кинилэр күннээҕи үлэлэрин эбээһинэһин толордулар.

“Мин бырааспын” киинэ Саха сирин олохтоохторун интэриэһин эрэ буолбакка, бүтүн дойду дьонун болҕомтотун тарта. Арассыыйатааҕы интэриниэт ситиминэн туһанааччы “АБ Быраастара” киинэ ааптардарыгар улахан махталларын тириэртилэр, видео киин тэлэбиидэнньэҕэ көстүбэтэҕиттэн хомойбуттарын биллэрдилэр, маннык хабааннаах бүтүн арассыыйатааҕы куонкуруһу тэрийэргэ этии киллэрдилэр.

Онон, сотору кэминэн, медиктэр үлэлэрин туһунан видеокиинэ бүтүн арассыыйатааҕы куонкуруһа саҕаланыаҕа, куонкуруһу Саха сирин Доруобуйа харыстабылын Министиэристибэтэ уонна АБ Быраастара социальнай ситим тэрийэн ыытыахтара.

Санкт-Петергбурдааҕы Киинэ уонна тэлэбиидэнньэ үнүбэрсиэтин бүтэрбит эдэр киһи Диана Худаева инники былаанын туһунан маннык диэтэ:

- Итэҕэллээх дьон буоларбыт быһыытынан инники былааммытын эрдэттэн этэрбитин туттунабыт. Арай биири этиэхпин сөп, социальнай киинэлэри, олор истэригэр медицинэ туһунан инникитин даҕаны устуохпут.

Ыстатыыйа дьоруойа уонна кинини кытары бииргэ үлэлиир оператордар Гаврил Старостин, Михаил Кардашевскай, ону тэҥэ продюссер Сардаана Барабанова артыыстарга, быраастарга уонна бырайыагы олохтуурга күүс-көмө буолбут дьоҥҥо барыларыгар улахан махталларын тириэрдэллэр.


“Мин бырааспын” видеоролигы манна киирэн көрүөххүтүн сөп: https://www.youtube.com/watch?v=wloI7UsLAW4


Иһитиннэрии ылыллыбыт аадырыһа: http://sakhalife.ru/socialnyiy-rolik-o-yakutskih-vrachah-proizvyol-furor-v-socsetyah/

Автор: SakhaLife

закрыть

Антиспам:

CAPTCHA