Хотугулуу-Илиҥҥи бэдэрээссийэлии үнүбэрсиэт учуонайдарын лиэксийэтин аны күөх экранынан көрүөхпүт

-->
Хотугулуу-Илиҥҥи бэдэрээссийэлии үнүбэрсиэт учуонайдарын лиэксийэтин аны күөх экранынан көрүөхпүт

29.12.2016 18:09:00

Рейтинг новости:

1+

Просмотров: 74

Хотугулуу-Илиҥҥи бэдэрээссийэлии үнүбэрсиэт учуонайдарын  лиэксийэтин аны күөх экранынан көрүөхпүт

2016 сыл күһүнүттэн саҕалаан, Хотугулуу-Илиҥҥи бэдэрээссийэлии үнүбэрсиэт учуонайдара үрдүк үөрэх кыһатын сонуннарын эрэдээксийэтэ тэрийбит “Биһиги үнүбэрсиэппит_лиэксийэлэр” диэн саҥа бырайыагын кыттыылааҕа буоллулар. Чинчийээччилэр уонна үнүбэрсиэт уһуйааччылара билими сырдатыы видеотун эргииригэр көрөөччү киэҥ араҥатын интэриэһин тардар лиэксийэлэри кэпсиэхтэрэ.

“Бэдэрээссийэлии үнүбэрсиэккэ билим араас эйгэтигэр чинчийии ыытыллар, ол иһин учуонайдар чинчийэр тиэмэлэрин көрөөччү киэҥ араҥатыгар таһаарар тоҕоостоох. Биһиги билиҥҥитэ аҕыйах учуонай лиэксийэтин уһуллубут, ол гынан баран оннооҕор маҥнайгы видеолиэксийэлэр олус интэриэһинэй ис хоһоонноохторун бэлиэтии көрдүбүт. Уһуйааччылар, чинчийээччилэр уон үс мүнүүтэ иһигэр чуолаан биир тиэмэни хабан бэйэлэрин көрүүлэрин туһунан кэпсииллэр, бириэмэ төһө даҕаны кылгаһын иһин, учуонайдар тиэмэ сүрүн санаатын көрөөччүгэ тириэрдэллэр”, - диэн санаатын үллэстэр ХИБҮ Информационнай бэлиитикэ уонна коммуникативнай технология салалтатын салайааччы Никита Аргылов.

Видеобырайыак Youtube-ка үнүбэрсиэт түө бэйэтин ханаалыгар тахсар. Салалта салайааччыта этэринэн, лиэксийэлэри дойду араас муннугар олорор, иһитиннэриигэ наадыйар үөрэхтээх дьон, ол эбэтэр эдэр чинчийээччилэр, устудьуоннар, аспираннар интэриэһиргиэхтэрин сөп. “Видеолиэксийэ биир сүрүн, үтүө өрүтэ диэн үс тылынан, чуолаан нууччалыы, сахалыы уонна аангылыйа тылынан тахсара буолар”, - диэн эбэн этэр салайааччы.

Билиҥҥи кэмҥэ үгүс киһи олоҥхону интэриэһиргиир, сыныйан үөрэтэр буолла. Оттон олоҥхону үөрэтии хайысхаларын, хомуйан сурукка тиһии туһунан АБ Хотугулуу-Илиҥҥи норуоттар тылларын уонна култуураларын үнүстүүтүн балкылыар уонна култуура хаапыдыратын сэбиэдиссэйэ, билэлиэгийэ билимин дуоктара Василий Илларионов кэпсиир. Биэрии тиэмэтэ киэҥ эйгэни хабар, учуонайдар бэйэлэрэ дьарыктанар идэлэрин, чинчийэр үлэлэрин ордук улахан суолталааҕын быһа тардан, көрөөччүгэ интэриэһинэй буоларын туһуттан, бэсиэдэ халыыбыгар олоҕуран санааларын үллэстэллэр. Ол курдук, культурология хаапыдыратын бэрэпиэссэрэ Галина Попова-Санаайа “Ыал укулаатын туһунан” лиэксийэтин көрөн, ыал буолан, олорор олоххут көнө, эриэ-дэхси буоларыгар, сөптөөх суолу таба тайанарга туһаныахха сөп. Маныаха маарынныыр, дьон олоҕор даҕаны, үлэтигэр, үөрэҕэр даҕаны тугу эмэ туһалыан, үөрэтиэн, өйдөтүөн сөптөөх лиэксийэлэри булан көрөр кыахтанныбыт.

Бырайыагы таһаарарга Хотугулуу-Илиҥҥи бэдэрээссийэлии үнүбэрсиэт сонуннарын эрэдээксийэтин телестудията туруулаһан үлэлиир. Эрэдээктэр Нина Гаврильева биэрии хас нэдиэлэ ахсын, оптуорунньук уонна бээтинсэ күн иккилии сюжет тахсарын туһунан бэлиэтиир. Аны, кэлэр 2017 сыл тосунньутуттан саҕалаан Хотугулуу-Илиҥҥи бэдэрээссийэлии үнүбэрсиэт учуонайдарын лиэксийэтин НКИХ ханаалыгар көрөргүтүгэр ыҥырабыт.


закрыть

Антиспам:

CAPTCHA