Физика бүгүҥҥү кыһалҕата тугуй?

-->
Физика бүгүҥҥү кыһалҕата тугуй?

12.05.2017 12:24:00

Рейтинг новости:

1+

Просмотров: 81

Физика бүгүҥҥү кыһалҕата тугуй?

Обществознание уонна омук тылын эксээмэнинээҕэр физиканы үрдүк баалга туттарар быдан уустук. Оскуолаҕа, физика БКЭ 75 баалы ыллаххына улахан үөрүү дииллэр. Оттон омук тылын дириҥэтэн үөрэтэр оскуолаҕа итинник көрдөрүү соччо улахана суох баалга тэҥнэһэр.

Бу биридимиэти үөрэтии уларыйбыт төрүөтүттэн саҕалыахха. Учуутал үөрэнээччигэ биэриэхтээх билиитин уопсай кэриҥэ оннунан хаалар. Арай, нэдиэлэҕэ бэриллэр чаас ахсаана уларыйда, физиканы үөрэтиигэ нэдиэлэҕэ 4 чаас бэриллэр эбит буоллаҕына, билигин 2 эрэ чаас буолла. Онуоха, үөрэтиллэр матырыйаал уопсай кэриҥэ оннунан хаалла. Нэдиэлэҕэ икки чаас устата көннөрү наадалаах матырыйаалы үөрэтэн, боростуой садаача суотун көрдөрүөххэ сөп, оттон ону өйдөтөргө бириэмэ хаалбат.

Оҕолор тоҕо физикаҕа ыарырҕаталларый? Физикаҕа БКЭ бэлэмнэнии кэккэ уустуктардаах. Ол төрүөтүнэн, талыы эксээмэннэр бары, бэлэмнэһин идэтийбит таһымыгар хайысхаланаллар. Үөрэнээччи физиканы дириҥэтэн үөрэтэр буоллаҕына, оскуола үөрэҕин былааныгар нэдиэлэҕэ 5-тэн аҕыйаҕа суох чаас көрүллүөхтээх. Маннык ирдэбилгэ өрөспүүбүлүкэ уонна аан дойду оскуолаларын 5% эрэ олоҕурар. Онтон атыттар нэдиэлэҕэ иккитэ эрэ физиканы үөрэтэллэр.

Физикаҕа БКЭ түмүгүн ырытыы көрдөрөрүнэн, өрөспүүбүлүкэ оскуолаларыгар физиканы уонна математиканы дириҥэтэн үөрэтэр кылаастар тиийбэттэрэ тахсан кэлэр.

Үөрэнээччи физиканы нэдиэлэҕэ иккитэ эрэ үөрэтэр уонна аттестатыгар "4" эбэтэр "5" сыана турбут, ону тэҥэ физикаҕа БКЭ үрдүк баалга туттарыам дии саныыр буоллаҕына, бука диэн сыыстарар. Аттынааҕы физико-математическай кылааска үөрэнэр оҕолор физикалара нэдиэлэҕэ биэстэ буоларын учуоттуон наада. Биллэн турар, оҕо барыта физиканы дириҥэтэн үөрэтэрэ сатаммат. Ол гынан баран, техническэй үөрэх салаатыгар туттарсар санаалаах үөрэнээччи садаачаны суоттуу, үрдүк үөрэх кыһата биэрэр билиитигэр бэлэмнэнэ үөрэниэхтээх.

Билигин биһиэхэ экэнэмиистэр уонна юристар элбэхтэр, ону тэҥэ үлэ булар уустук. Оттон үрдүк квалификациялаах инженердар тиийбэттэр, ол иһин физиканы дириҥэтэн үөрэтэр кылаастар элбииллэрэ наада. Үнүбэрсиэккэ киирбит дьон номнуо бэлэмнээх кэлиэхтээхтэр.

Физика садаачалара олус ыарахаттар диэн санаа биллэн турар сыыһа толкуй. Мин санаабар, үөрэнээччилэр даҕаны, учууталлар даҕаны бу сыыһа санааҕа салайтаран физиканы ситэ өйдөөбөт, ылына да сатаабат түгэннэрэ баар буолар.

Биллэн турар, маннык санааҕа бары тайанналлар диэбэппин. Биэс сыл анараа өттүгэр физика хонтуруолунайын сорудаҕа кырдьык уустук этэ. Ол гынан баран, чуолаан уустук сорудах учуутал оҕолору кытары бииргэ, эппиэтинэстээхтик сыһыаннаһан бэлэмнэнэригэр үчүгэйинэн дьайарын умнумаҥ.

закрыть

Антиспам:

CAPTCHA