Кини БКЭ туттарар баҕаттан сэттэ чаас атынан, оччо чаас тыраахтарынан айаннаабыт

-->
Кини БКЭ туттарар баҕаттан сэттэ чаас атынан, оччо чаас тыраахтарынан айаннаабыт

14.06.2017 15:35:00

Рейтинг новости:

+

Просмотров: 210

Кини  БКЭ туттарар баҕаттан сэттэ чаас атынан, оччо чаас тыраахтарынан айаннаабыт

Катя Готовцева Дыгдал диэн кыра дэриэбинэҕэ төрөөбүт. Кыра эрдэҕиттэн тылга дьоҕурдаах буолан тылы үөрэппит уонна Тас дойду тылын, олоҕун үөрэтэр үнүстүүккэ туттарсан киирэр баҕалаах эбит. Ол баҕа санаатын олоххо киллэрэригэр французскайга БКЭ туттарыахтааҕа. Эксээмэҥҥэ бэлэмнэнии улахан кыһалҕаны үөскэппэтэх, оттон эксээмэни туттара барарыгар күчүмэҕэйдэри көрсүбүт.

Омук тылыгар БКЭ оройуон киинигэр, ол эбэтэр Катя олорор дэриэбинэтиттэн 125 км ыраах турар сиргэ тиийэн туттарыахтаах эбит. Саас аайы халаан уута кэлэн, айан суола алдьанан, барыы-кэлии тохтуур. Этэргэ диэри, ханнык даҕаны бэйэлээх тыраанысапар кыайан айаннаабат хайа охсуулара үөскүүллэр, дьаама, барыта толору уу-хаар буолар эбит. Оттон Катя онтон иҥнэн турбатах.

Кыыс аҕатыныын айанныыр суолларын былаанын толкуйдаабыттар. Дыгдалтан аттынааҕы сытар бөһүөлэккэ диэри атынан барарга санаммыттар, онтон салгыы Кэптэнигэ диэри тыраахтарынан, дьэ ол эрэ кэннэ массыынанан айанныахтаах.

Ыам ыйын 18 күнүгэр бүтэһик чуораан тыаһыыр, бары "выпускнойга" бэлэмнэнэ сылдьар кэмнэригэр Катя ат үрдүгэр олорон баран айаҥҥа турунар.

Катя БКЭ туттара барбытын туһунан маннык кэпсиир:

Дэриэбинэттэн да тахса иликпитинэ, атым Орлик туохтан эрэ сиргэнэн тыа диэки көтүппүтэ, икки кэлин атаҕар тура-тура хаста даҕаны миигин быраҕа сыспыта. Онтон ыккый ойуур быыһынан киирэн сүүрэ турбута. Аҕам диэки "абыраа" диэбит харахпынан көрөн аһарбытым. Оттон аҕам иһигэр долгуйа-долгуйа саҥата суох көрөн турбута, кини кыттыспыта буоллар аппыт сиргэнэн ханна-ханна тириэрдэрэ биллибэт этэ.

Мин Орликпын кытта көтүтүү да көтүтүү, иирэ талахтарга сирэйбин дэлби хайа тардыбытым, розовай бейсболкам ханна эрэ көтөн хаалбыта, аһары сахсылламмын муннум хаана барбыта. Дьэ, онно кыыһыран турбутум. Атым быатын күүскэ кэннин диэки ыга тардан барбытым, ол да буолла бастаан утаа атым сүүрэрин тохтоппотоҕо, син балай да буолан баран, күөл кытыытыгар тиийэн туох да буолбатаҕын курдук уоскуйан хаалбыта. Мин санаабар, "Спирит - душа прерий" диэн мультикка курдук Орлигым миигин тургутан көрдө быһыылаах, тулуйар буоллаҕына салгыы айанныам, тулуйбатаҕына барбатын диэн. Онтон салгыы үчүгэйдик айаннаабыта.

Оннук Балыктаах диэн дэриэбинэҕэ тиийбиппит. Онно английскайы туттара бараары үс кыыс биһигини күүтэн турар этэ. Инньэ гынан аны ол кыргыттары кытары тыраахтар бобуоскатыгар олорсон салгыы айаҥҥа туруммуппут. Айаннаан тиийээт сиспин даҕаны көннөрбөккө, тыраахтар бобуоскатыгар олорбутум, эбии куртка биэрбиттэрэ уонна пырысыаппытын тенынан бүрүйбүттэрэ.

Быһа холоон эмиэ сэттэ чаас айаннаабыппыт. Олус тымныы уонна хараҥа этэ, утуйуохча буолан истэхпит аайы суол оллура-боллура элбэҕэ бэрдиттэн түөрэ-лаҥкы барарыттан кыайан утуйбатахпыт. Кэптэнигэ тиийэн хоноот, сарсыныгар номнуо эксээмэн туттара барбыппыт.

Бу үлүгэрдээх ыраах уонна эрэйдээх айаны соччо билбэккэ хаалбытым. Эксээмэн кэнниттэн соһуйбут, сөхпүт-махтайбыт учууталлар аһаппыттара, хайдах кэлбиппин сураспыттара. Онтон мин хайдах эрэ саата быһыытыйбытым. Кыбыстан хаалбыт сирэйдээх пюрелаах эппин сии олорорбун өйдүүбүн.

Катя БКЭ 85 баалга туттаран Хотугулуу-Илиҥҥи бэдэрээссийэлии үнүбэрсиэти бүтэрбитэ. Кини билигин Дьокуускайдааҕы тыл киинигэр үлэлиир, үгүс сири-дойдуну тыраахтарынан буолбакка массыынанан, сөмөлүөтүнэн кэрийэр, элбэх доҕордоох-атастаах.

Автор: Мел.фм

закрыть

Антиспам:

CAPTCHA