-
-
1142
23.11.2017 12:04:40 - Распечатать
Сэтинньи 6 – 9 күннэригэр Хотугулуу – Илиңңи Федеральнай Университекка төрдүс төгүлүн ыытыллар Саха культуратын нэдиэлэтэ үрдүк, орто үөрэх кыһаларыттан, оскуолалартан 101 кыттааччыны муста.
Тэрийээччилэр, ХИФУ Хотугулуу – Илиңңи Норуоттар Тылларын уонна Культураларын Институтун СП – 15 бөлөх устудьуоннара, уопсайа 7 күрэҕи иилээн – саҕалаан ыыттылар. Ол курдук, күрэстэр музыкальнай, инструментальнай, фольклор, брейн – ринг, спортивнай, хаартыска, боди – арт курдук көрүңнэргэ арахсан туспа күннэргэ ыытылыннылар.
«Ырыа кэрэ эйгэтэ» диэн күрэх сахалыы эстраднай, этническэй ырыаны толорор эдэр ыччаты сыанаҕа көрсүһүннэрдэ. Уопсайа 30 кыттааччыттан эстраднай көрүңңэ ХИФУ ХИНТуоКИ 1 кууруһун ЛР – 17 бөлөх устудьуона Элеонора Егорова, этническэйгэ «Боккуойа» дэгэрэң ырыатын толорбут Ньургуйаана Никитина (АГИКИ, 1 куурус, ЭХТ – 17 бөлөх) кыайыылаах үрдүк аатын ыллылар.
Нөңүө күн, «Хомус кута» күрэс үрдүк, орто үөрэх кыһаларыттан, ону таһынан Хаңалас улууһун Төхтүр оскуолатыттан 15 кыттааччыны көрүстэ. Түмүккэ АГИКИ 1 кууруһун устудьуона Дьулустаан Николаев кыайыылаах аатын ситистэ.
Чабырҕах күрэҕэр АГИКИ уонна культура колледжын студеннара кыттыыны ыллылар. Дьүүллүүр сүбэ быһаарыытынан, АГИКИ 1 кууруһун устудьуона Изабелла Фомина кыайыылаах аатын сүктэ.
Оскуола оҕолоругар аналлаах брейн – ринг (англ. Brain – мэйии; ол эбэтэр «өй оонньуута») интеллектуальнай оонньууга Айыы кыһата, республикатааҕы лицей – интернат, 17 – с нүөмэрдээх оскуолаларыттан 21 үөрэнээччи 1 – гы миэстэ иһин турууластылар. Кыттааччыларга араас интэриэһинэй, толкуйдатар тиэмэлээх ыйытыылар бэриллибиттэрэ. Оонньуу түмүгүнэн, 1 – кы миэстэ хаһаайыттарынан республиканскай лицей – интернат үөрэнээччилэрэ буоллулар.
Үгэскэ кубулуйбут «Добун күүс» тэрээһин 8 бөҕөһү тургутан көрдө. Уолаттар саха омук оонньууларынан күөн көрсөн, тыын таһааран, олус сэргэхсийэн тарҕастылар. Кыайыылаах – ХИФУ Физико – Техническэй институтун 2 кууруһун устудьуона Николай Шадрин.
«Кэрэни кэрэхсээ» фотоконкурс 11 хаартысканан ойоҕос дьарыгырааччыны түмтэ. Экология сылын чэрчитинэн, үлэлэр Саха Сирин айылҕатын дьикти көстүүлэригэр анаммыттара. ХИФУ Медицинскэй Институтун 2 кууруһун устудьуона Варя Колосова кыайыылааҕынан таҕыста.
Нэдиэлэҕэ саңа сүүрээн, дьон интэриэһин тарпыт тэрээһин – боди – арт (англ. body art — «эт – сиин искусствота; киһи этигэр уруһуйдааһын»). Айар куттаах худуоһунньук студеннарга эрдэттэн «Байанай» тиэмэтэ бэриллибитэ. Подиумңа кырса, эһэ, бөрө, мохсоҕол, бэдэр уонна тайах уобарастара дьүһүйүллүбүттэрэ. Кыайыылаах – ХИФУ ХИНТуоКИ 3 кууруһун СИМК – 15 бөлөх устудьуона Диана Шадрина.
Ити курдук, Хотугулуу – Илиңңи Федеральнай Университекка Саха культуратын нэдиэлэтэ үрдүк күүрүүлээх таһымңа буолан ааста. Эдэр ыччат хайаан даҕаны Саха культуратын ис кутугар угуннаҕа буолуо диэн эрэл санаалаах аныгыскы сылы кэтэһэ хаалабыт.